स्मरण
दोन शब्दांसाठी तुजसवे जुळलो बहुदा
आठवांच्या स्मृतिसवे मग जळलो बहुदा
सुखाने मजसाठी दार ठोठावलेच नाही
अर्धा जुगार मोडीला अन् हरलो बहुदा
डुंबत गेलो नकळत दुःखाच्या सागरात
सुखासवे किनारी शेवटी तरलो बहुदा
दोन घास पिलांसाठी इमानदारीने भरविले
वैऱ्यांसाठी बेईमान मग ठरलो बहुदा
खंगलेल्या हाडांनी नाते त्यांचे सांधत गेलो
फाटत गेलो अन् किनारी उरलो बहुदा
कुठे टेकावा माथा अन् कुठे घ्यावा विसावा ?
सरण पेटले अन् राखेतून स्मरलो बहुदा
© कमलेश सोनकुसळे