संवेदना

तुझ्यातून फुटणाऱ्या

भावनेच्या लाटा,

माझ्या शब्दातून

झिरपू लागल्या,

तेव्हा आपण

जवळ आल्याचे,

प्रथम मला जाणवले.

पुढे,

तुझ्या सुख-दुःखाची चाहूल

मला माझ्या,

*संवेदनासारखी* वाटली,

आणि

आपल्यातील संबंधावर

माझा विश्वास

बसू लागला.

आता,

बरेच दिवस

उलटून गेल्यावर,

आपण एकमेकांना

पुन्हा शोधू लागलो,

आपल्यातील *संवेदनेचा*

शोध मात्र,

आजही संपलेला नाही.

© कमलेश तु. सोनकुसळे

काटोल, नागपूर
7588691372

खेळ हा सावलीचा

स्वप्नांवर आरूढ होऊन,

वेध घ्यावा नशिबाचा,

काबीज करावा किल्ला,

शिखरावरच्या यशाचा.

सुगंधी गुलाब होऊन, 

वेध घ्यावा काट्यांचा,

उन्हातही खेळता यावा,

खेळ हा सावल्यांचा.

कल्पनेत मग्न होऊन,

वेध घ्यावा शब्दांचा,

विरहातही वाटावा,

क्षण प्रत्येक प्रेमाचा.

स्वच्छंद भरारी मारून,

वेध घ्यावा गगनाचा,

हळूच शोधता यावा,

सूर्य या जीवनाचा.

रचना:   कमलेश सोनकुसळे

            काटोल, नागपूर

            7588691372